انت فاكرنا لاقين الفلوس دى في الشارع .
ما تتكلمش بصوت عالي في الحمام .
والله ما انت فالح .. وادي دقني أهه ..
ما تنمش غير لما تغسل سنانك.
ما تلزقش في التلفزيون كده .. نظرك هيضيع.
سلم على عمك كويس يا ولد.
يا ابني محدش هينفعك.
ما تطلعش ايدك من الشباك.
قصة الغريق الكاذب اللي كل مره يقول الحقوني ... لحد ما غرق بجد .
ربنا يرزقك بعيل يوريك اللي ورتهوني .
ما تطلعش على الملايه النظيفه و رجليك متوسخه كده .
نسيت تشرب ؟ نسيت تاكل ؟ نسيت تاخد المصروف ؟ نسيت تعكنن عليا و على امك ؟
طلع ايدك من جيبك و انت بتكلمني .
ايه الا مبالاه و الاستهتار اللي انت عايش فيهم دول قوم اقرا لك كلمتين ينفعوك .
وطي المدعوق ده شويه .
انت فاكرنا نايمين على ودانا ؟
يا ابني انت مسطول ولا ايه ؟
ما تلبسش القميص على اللحم زي العيال الصايعه ..
بلاش أكل بره.
كلمنا لما توصل.
عيـــب ... لازم تحترم اللي أكبر منك .
لو شفت خناقه ما لكش دعوة بيها .
لازم تأكل سلطه .
اوعى تكدب عليا كده تاني مرره .
اوعى حد غريب يديلك حاجه تاكلها و تشربها و تاخدها منه .
يا ابني كلم خالتك العيانه اسأل عليها .
بلاش لعب في الشارع .
ما تعليش صوتك .
وانت فاكر احنا مستنيين منك حاجه .
المسلسل مش هينفعك ... قوم .
ما تقعدش قدام المروحه وانت مستحمي .
كفايه رغي في التليفونات.
بلاش وقفة الشبابيك و البلكونات .
اوعى تقول لحد هات لي حاجة .
كل على مهلك .. وامضغ كويس .. وما تكلش وانت واقف ..
وكل من قدامك ما تحفش .
اطفي التلفزيون وقوم ذاكر . أو اطفي التلفزيون و خش اوضتك .
ربنا يهديك ربنا يهديك ...
ما تمشيش حافي في السقعة دي.
ما فيش مذاكرة على المزيكا ..
أو ..
بتذاكر ازاى والبتاع ده شغال جنبك ..
افرد ظهرك .
ما تتأخرش بعد المدرسه و تقعد تصيع مع أصحابك .
بص كويس و انت بتعدي الشارع .
ومالها الكتب بتاعة الوزاره ؟ ! اوبالنسبة للكليات ليه كورسات ما انت لوبتحضر
محاضراتك كنت فلحت .
اللي بيشيل قربه مخرومة بتخر عليه لوحده ..
لو مش فاهم حاجه ارفع ايدك و قول للأستاذ مش فاهم . . متتكسفش .
تقعد في أول صف قدام السبوره ..
ما تردش عليا .
مش عايز اسمع صوت .
مالكش دعوة بالسياسة .
وماتمشيش في مظاهرات .
التهديدات المخيفة شكلا و الكارتونية مضمونا مثل:
هأقطم رقبتك أو هأقطع ايدك
أو هأقطع لك لسانك أو هأدبحك دبح .
و أخيرا ::
ضرب امثلة تشجع على الكفاح و أشهرها أحد الأقارب اللي كان بيذاكر على لمبة جاز أو
على عامود النور الي في الشارع و نجح وخد الدكتوراه وسافر أمريكا.
و لما يكبر و يعوز يتجوز.......
- هى دي بقه اللي انت بتحكي عنها ....... دى معصعصة و مسلوعة
- قوم ... قوم ..... داهية تقرفك
- مش كنت اتجوزت منى بنت عمك .. اهى منا و احنا منها
- الجوازه دي مش لازم تتم
- لو اتجوزتها ... لا انت ابني و لا انا اعرفك
- (حاحرمك من الميراث ( مع العلم ان الاسرة كلها و رثت الفقر كابرا عن كابر
- بتحب ..... حب ايه يا ابو حب
- بتحبيه .... حبك برص
- ما تاخدش السهتانه، ولا ام كحله و لبانه، تاكل و تعمل عيانه
- لا يا هبلة ... اربطيه بالعيال
- اقرب طريق الى قلب جوزك معدته
- إحنا زمان كننا بنتجوز و مانشوفش بعض إلا ليلة الدخله (و عشان كده كترت العاهات في بلادنا)
- كتب كتابك على سحلول ابن عمك الخميس الجاي ( تقولش بيبيع سيارة؟؟)
- ولا يهمك بكره اجوزك سيد سيده (او ست ستها) ...................... تقولش العيال دول عبيد او
اقطاعية؟؟؟
و لما يعوز يجيب عربية
- يا عم افلح الاول في مذاكرتك و بعدين قول عاوز عربييه
- لما تشتغل و تصرف على نفسك ابقى اشتري يا روح امك !!!
- و مالها المواصلات
- و حتركنها فين بقى ؟؟ ( ابن الإيه، تقولش يعني ان الركنه هي المشكله)
- لو الاب متريش يقول : عاوز كام؟؟
الرئيسية 
موضوع: ( اشهر جمل بيقولوها الأب و الأم في مصر) 
الإثنين يوليو 30, 2007 9:15 pm
